شعر بالعاميه عن احوالنا فى ثوره مصر

                         ثوره مصر

اصحوا وفوقوا يامصريين

فين الثوره  .. فين الشعب

فين الملايين

ثوره مصر

بح خلاص

ثوره وكانت

ثوره اتسرقت

ثورها سرقها

الجيش والعسكر

 والاخوان والسلفيين 

ثوره وكانت

حلم الشعب

حلمه ببكره .. وحلمه ببعده

حلم بسيط .. بالحريه

 عمره مافرق حتى فى أحلامه

بين اسلامى او نصرانى

باأسم الدين

وحلمه  اتحقق

حلم جميع  المصريين

فاكرين

لما وقفنا وقلنا

لازم يمشى .. الظالم يمشى

كل منافق .. وكل حرامى

يامش ماشيين

لقينا بسرعه .. ولازم اتذكر

يوم تلاتين

كل عميل .. وكل منافق

غير جلده .. وغير أسمه

ودخلوا مابينا .. ووقفوا معانا

وسبوا مبارك .. ولعنوا نظامه

ولبسوا الوش ..زى كتير م الثوريين

وبعد الثوره

ركبوا عليها وضحكوا علينا

وقالوا ع الشعب

ده مش جاهز

لازمه حمايه  ولازمه وصايه

باسم الدين

أما العسكر .. قالوا علينا

شعبنا همجى  .. مش متنظم

لازمه الظبط .. ولازمه الربط

وهيحتاج ..  حبه  تمارين

علشان يحكم  .. أو يتحكم

أو يتكلم باسم جميع  المصريين

أزاى هيمشى

دوله كبيره  و تعداد ناسها

بالملايين

وطبعا هم   .. هتلاقى فيهم

اللى هيظبط .. واللى هيربط

ويقهمنا نمشى  .. امورنا

أما التانى

هيلبس شيخ

يوعظ فينا ... ويفهمنا

أزاى نحكم باأسم الدين

اول نصبه .. لما العسكر

جابوالنا  وزاره

واختاروا وزرا

وعملوا دعايه  .. وفيلم كبير

قالوا فى بدايته

ان كبيرهم  .. دا   أشرف واحد

أحسن واحد

ده طول عمره   .. عدو مبارك

ونفسه يشوفه   .. وهو معلق

م الرجلين

وبعد شويه .. كشفنا حقيقته

وقلنا يغور .. فى ستين داهيه

هو وشكله وساعته وشرزه

ويريحنا من أشكال  ..المنتفعين

جابوا لنا  التانى .. أسمه شرف

اسم نضيف .. واصل شريف

لكن حطوا معاه

يجيى كام واحد ..من اتباعهم

الو حشين

كتفوا ايده  .. وكتفوا رجله

وقالوا يروح .. يرضى الملايين

وسابوا كلابهم  .. تعمل ثوره

تحت الارض  وتقتل فينا

التغيير والحريه  ..وحلم سنين

والتانيين

بيهاجمونا .. ويحاربونا

بااسم الدين

بس الثوره

ضرورى ولازم

تكمل حتما ..ضد العسكر

وضد الفاجر .. واللى يتاجر

باسم الدين

أصحوا وفوقوا يامصريين

بكره تشوفوا .. مصر بلدنا 

لما بتصحى  ..بتبقى جميله 

وتلقى البسمه ..ضرورى ولازمه

وركن اساسى  فى خفه دم المصريين

هنرجع تانى   .. نقول النكته

ونفرعها  .. ونوزعها

وتبقى الضحكه .. ملو وشوشنا

ضحكه كبيره  ..ضحكه تفرقع

ونوزعها ..شمال ويمين

ويبقى الحب   .. اساسى مابينا

ويبقى العدل خير متوزع  ع الملايين

ويبقى الواحد منا ..

راضى بحظه   وحامد ربه..  وشاكر فضله

وكل حياته .. واهبها بكيفه

 لولاد بلده المصريين

أصحوا وفوقوا يامصريين

ثوره وقامت ولازم تكمل

ومفيش حق هيضيع ابدا

للصاحين

اوعوا تقولوا احنا خلصنا

نهدى شويه ونسيب غيرنا

يجيبوا حقوقناباأسم الدين

طيب فكرونى

امتى الناس دى كانت صادقه

فى أى كلام .. أو أى يمين

تمانين عام مروا عليهم ومروا علينا

ولا شوفناهم مره معانا قالوا لأ للظالمين.

لازم نفهم أن ولائهم للوهابى

 وعمره ماكان للمصريين

أصحوا وفوقوا يامصريين

البحث فى الذكريات

• بعد سنوات رجعت هنا تانى ادور واشوف انا كنت ايه من سنين وكنت باافكر ازاى وكنت بااكتب ايه وياترى الكتابه كانت معقوله ولا شويه عك وتهييس . وبعد القرايه لقيت انى كنت احسن من دلوقتى وكنت بااكتب حاجات لها قيمه لكن النهارده انا بااكتب فى الفيس بوك تلغرافات وكمان تلغرافات ممكن ماتوصلش للناس يعنى رسايل منه واليه بعلم الوصول .. علشان كده قررت انى ارجع لمدونتى هنا واكتب اللى يعجبنى من تانى يمكن حد يقراه ولو ماحدش قراه .. برضه انشالله ماحد قراه .. يعنى انا هااقبض من اللى هيقراه لكن اهى شويه حاجات بتبقى حذقه الواحد يقوم يفرغها على الورق وينزلها من دماغه لانها بتبقى عامله زى ناموسه فى دماغ الواحد ولما بيرميها على الورق بيرتاح منها علشان يعطى فرصه لناموسه جديده تزن فى دماغه .. لما رجعت وقريت الكلام اللى كاتبه من كام سنه وقبل الثوره اللى قامت فى يناير لقيتنى زى مايكون كان مكشوف عنى الحجاب وكنت كاتب كلام كبير وكلام زى مااكون مكشوف عنى الحجاب وزى مااكون جبت النتيجه من الكنترول وكل كلمه كتبتها اتحققت يعنى ايه ؟ كده الواحد ممكن يصدق نفسه ويطول شعره ومايستحماش ويلبس هدوم معفنه ويعمل فيها فيلسوف الثوره وانه كان من العشره المبشرين بالثوره .. طيب وبعدين لو الثوره فشلت ولا العسكر عملوا انقلاب ولا الدقون ركبوا البلد وطلع النص الاخير من كلامك كذب هتنضرب مليون جزمه على دماغك ويقولوا للك ابقى اتغطى وانت نايم ... طيب ايه العمل ؟ .. انا لقيت أحسن حاجه أعملها أنى أأقعد هنا وأكتب اللى فى دماغى واهى حاجه للأيام وتفكرنى أنا كنت باافكر ازاى وازاى كنت بااشوف الدنيا وبعدين لو حد قرا الكلام وعجبه ماشى لكن اى حد ماعجبوش كلامى مش هاارد عليه بس هو كمان يكون عنده دم وبلاش يطول لسانه ... أنا كاتب الكلام ده لنفسى زى ماكنت بااكتب زمان الكلام اللى ييجى على دماغى فى كشكول واحطه فى الدرج واقراه كل مايهفنى مزاجى يعنى دى افكارى الشخصيه يمكن تنفع مع حد تانى ويمكن تودى غيره فى داهيه ... يعنى انا مش مسئول عن أى حد يتهبل وياخد كلامى ويعمل به ده كلامى انا وكاتبه لى انا وماليش دعوه بحد تانى . ومن النهارده هاارجع لمدونتى حبيبتى واكتب اللى يعجبنى واللى متضايق يخبط راسه فى راس المشير طنطاوى . معلهش أصل انا كل ماييجى يوم عيد ميلادى أعمل زى الخواجه لما يفلس ويدور فى دفاتره القديمه والحمد لله انا لاخواجه ولا حيلتى حاجه يعنى انا لاهااخاف من الفلس ولا عندى دفاتر قديمه غير دفاتر المديونيات اللى عليا وكده مش قلقان من حد هنا. يلا نبدا من دلوقتى بكتب هنا من جديد  بس ياريت نسمع تسقيفه بقى علشان نطلع  شويه من الجراب اللى مفتحنهوش من سنين ... ياااااااااااه كام سنه مرت وانا لم اسمع أو أرد على تعليق هنا ويمكن فيه ناس من اللى كانوا هنا رحلوا الى العالم الآخر ويمكن ناس كرهت المدونات واشتغلت على تويتر وفيس بوك لانه عامل زى سندوتشات تك اواى بتوصل سخنه وتتاكل وهى سخنه لكن المدونات عامله زى الطبيخ الدسم لما بتبرد ماينفعش ناكلها لازم نسخنها من تانى .. يعنى اعتبرونى راجع هنا اسخن الطبيخ البايت علشان نعرف ناكله . او نطبخ حاجه جديده تنفع لكل وقت ... عموما هنحاول نعمل كده وربنا يوفقنا ويبعد عننا ولاد المرشد وولاد ابو أسماعيل .
•                                           مع تحيات أبو النجوم