الاثنين، ٣ نوفمبر ٢٠٠٨


فين المصرى ؟


أنا فلاح نزلت مصر
أتمشى وأتغندر


وأشوف نفسى وأحوال

أخواتى ف البندر


لقيت الحال غير الحال

وحاجه تغم وتكفر


لقيت المصرى كئيب

الشكل والمنظر


من كتر الدق على راسه

وفى همومه بيجرجر


راحت البسمه والضحكه

ولا اتفضل ولا شكرا


سألت ياناس فين المصرى

أبو النكته أبوكاركتر


لقيت المصرى بدون روحه

ومات الأصل والجوهر


لا لاقى قوت يومه ولاحتى

بالصبر يتصبر


حكومه بتوزع الهم والغم

وعلى ولادنا بتتشطر


رجعت ببالى لآيام مرها

الشهد والسكر


وخرجت منى تنهيده وآآآه

من قلب بيفرفر


طلع من صدرى صوت

ولادانه بتتفجر


الله يرحمك ياجمال وألف

رحمه عليك ياأنور

----

هناك تعليقان (٢):

ابو النجوم يقول...

أشكركم

م/ الحسيني لزومي يقول...

تقبل الله منا ومنكم
وكل عام وانتم بخير

ياحكومه طظ فيكى .. وطظ فيك ياشعب .. بلا وطنيه.. بلاوجع قلب .. حياتنا هباب .. فى هباب .. والعيشه غلب .. فى غلب ..